Monday, November 3, 2014

W
 

Pòtoprens, lendi 03 Novanm 2014


#001

Not pou laprès

FOPARK (Fòs Patriyotik pou Respè Konstitisyon an) koube byen ba pou l salye senatè Moïse Jean Charles kap travèse yon moman difisil ak lanmò manman l Madam Ménio Moïse ki te gen non jèn fil Elisabeth Suprême.

Pendan tout vil manmenn se konsa yo te rele l, li te  devlope bon jan relasyon ak moun kominote baryè Batan nan grand lakou, nan komin Milo. Manmenn mouri ak 76 lane sou tèt li, li kite déyè l yon potorik gason ki se Moïse Jean Charles ki senbolise rezistans kont diktati rejim tèt kale a ap enplante nan peyi a depi plis pase 3 lane.

Maladi madam Ménio Moïse kòmanse an 2004, pandan senatè a te majistra Milo, vil istorik ki tap goumen ak rebèl Guy Philippeyo. Depi lè a se kalvè lap monte ak maladi sik kap monte desann. Aprè manifestasyon 17 oktòb 2014 la, lè lapolis te simen gaz sou senatè a, bri te kouri al jwenn manman l ki tap resevwa swen Santiago, an repiblik dominikèn kòm kwa, yo touye senatè Moïse nan lari pòtoprens. Pawòl sa te agrave sitiyasyon Madam Ménio Moïse ki te deja tap sibi 3 seyans dyaliz chak semèn.

Se nan moman senatè Moïse, ap mobilize militan toupatou pou manifestasyon jedi 30 oktòb la ki tap fèt pou liberasyon Biron Odigé ak Rony Timothée ke pouvwa a anlve nan mitan yon manifestasyon pasifik, li resevwa brid sou kou nouvèl lanmò manman l, manmenn.

FOPARK sezi okazyon an pou kanpe ak senatè a epi di l li pa pou kont li: tout peyi a avè l. Manmenn pat travay pou gran mesi. Rekòt li nyo pral kontinye donnen non sèlman nan gran lakou kote l tap viv, men nan tout rakwen teritwa a.

FOPARK ap akonpaye senatè a ak tout fanmi l nan fineray Madam Ménio Moïse kap chante samdi 8 Novanm 2014 la nan L’église Baptiste Philipienne nan vil Milo. 

Aprè antèman an tout militan, fanm konsekan ap reprann flanbo mobilizasyon an pou kapote rejim tèt kale ròz la, menm jan pèp Boukinabé a sot pouse prezidan asasen Blaise Comparoé mete l deyò, pou tèt li tap chache vyole konstitisyon an pou rete sou pouvwa a.

Menm jan nou te sèvi ak egzanp batay kont Mobutu setse Sekou an 1986 pou n te chase rejim sanginè Duvalier a sou pouvwa a.

FOPARK mande pèp ayisyen an swiv modèl Boukina Faso a pou trase chemen libète l pou n mete sou pouvwa yon ekip kin pou kondwi peyi a nan modènite.

Pandan nap prezante kondoleyans yon lot fwa ankò bay senatè Moïse Jean Charles, nan noBiron Odigé ak Rony  Timothée, 2 dirijan nan FOPARK ki nan prizon pou konviksyon politik yo, yo te anlve nan manifestasyon jou ki te 26 oktob la e ki poko prezante devan jij natirèl yo jan lalwa mande sa jodi a fè 9 jou.

FOPARK salye tout militan konsekan, tout demokrat progresis ki kwè nan batay pèp la pou konstwi yon sosyete egal ego kap garanti libète byen nèt kòm prensipal valè dwa moun e FOPARK  kase randevou ak tout militan sou beton an.

Moun ki siyen se :

 

  1-Dalès RAYMOND, Secrétaire Général    

  2- Jose Benoit Louissaint , Secrétaire Adj. 

  3Ronique Paul Joseph, Trésorière 

  4- Raynold JEAN, Délégué.     

                                                                                       

 


No comments:

Post a Comment